Коронавирус жұқтырған "Қайрат" футболшыларының жағдайы белгілі болды
Алматылық "Қайрат" клубы індетке шалдыққан Нұралы Әліп пен Сұлтанбек Астановтың денсаулығы туралы айтып берді. Бұл екі футболшы ұлттық құрама мен жастар құрамасына шақырту алып, тест тапсырған болатын. Соның қорытындысы бойынша футболшылардан коронавирус шыққан еді,- деп хабарлайды Vesti.kz тілшісі.
Клуб таратқан ресми ақпарат бойынша, қазір екі футболшы да коронавирусқа жиі тест тапсырып, дәрігерлердің бақылауында екен.
"Нұралы Әліп пен Сұлтанбек Астанов ұлттық құрама сапына барып, COVID-19 тест тапсырып, содан вирус анықталған. Бұл ойыншылар бірден ұлттық құрамадан да, алматылық командадан да оқшауланды. Қазір екі футболшының да жағдайы жақсы. Дәрігерлердің бақылауында", - делінген хабарламада.
Сондай-ақ апта басында команданың барлық футболшылары, бапкерлері және команда қызметкерлері тест тапсырған. Оның қорытындысы бойынша, ешкімнен вирус шықпады.