Марин Томасов "Астана" - "Славия" кездесуінің үздік футболшысы атанды

Еуропа футбол одағының (УЕФА) ресми сайты елордалық клубтың хорватиялық жартылай қорғаушысы Марин Томасовтың Еуропа лигасы топтық кезеңінің екінші туры аясында өткен "Астана" және "Славия" клубтары арасындағы ойынның үздік футболшысы деп таныды. 

А тобындағы "Астана" және "Славия" арасындағы кездесу кеше елордадағы "Астана Арена" стадионында өтіп, 1:1 есебімен аяқталды. Кездесудегі есепті ойынның 18-минутында прагалық клубтың қорғаугысы Майкл Нгадеу-Нгаджуи ашса, кездесудің 42-минутында Томасав есепті теңестірген еді. Ойындағы голдарды мына сілтемеге өтіп, көре аласыздар. 

Еске салайық, бұл тең ойыннан кейін "Астана" клубының қоржыны тағы 120 мың еуромен толықты. Осылайша "Астана" биылғы еуромаусымнан жалпы 6 миллион 300 мың еуро көлемінде пайда тауып отыр. 

Ал Еуропа лигасы топтық кезеңінің екінші турынан кейін Станимир Стойлов командасының еншісінде 1 ұпай бар. Бұрғаны күні біздің клуб израильдік "Маккаби" клубымен А тобында 3 және 4 орынды бөлісіп тұр.