Еуропа лигасы ойыны алдында "Қайраттың" екі көшбасшы ойыншысы қатарға қосылды

Алматылық "Қайраттың" қақпашысы Стас Покатилов пен қорғаушы Небойша Косович команданың қатарына оралды, деп хабарлайды KazFootball.kz порталы. 

Бұл екі футболшы да "Қайраттың" Чемпиондар лигасы екінші іріктеу кезеңінде "Црвена Звезда" (0:5) кездесуге қатыса алмады. Ал аталған кездесуді алматылық команда жалпы 2:6 есебімен жеңіліп қалды. 

Косович "Црвена Звезда" командасына қарсы бірінші кездесуде жарақат алып қалған болатын. Ал Покатилов болса Сербия еліне ұшар алдында коронавирус жұқтырып алды. 

Айта кетейік, 5 тамыз күні "Қайрат" командасы Еуропа лигасы үшінші іріктеу кезеңінде армениялық "Алашкерт" командасына қарсы кездесу өткізеді. 

Жауапты кездесу 12 тамызға жоспарланған.