Рыбакина Уимблдон турнирінің финалына шықты

Қазақстанның бірінші нөмірлі теннисшісі Елена Рыбакина Уимблдон турнирінің финалына шықты, деп жазады Vesti.kz тілшісі. Ол еліміздің атынан жекелей сында финалға дейін жеткен алғашқы теннисші атанды. 

Жартылай финалда WTA рейтингінде 23-орында тұрған Рыбакина 18-орындағы румын қызы Симона Халеппен кездесті. 

37 минутқа созылған бірінші сетті Рыбакина 6:3 есебімен өз пайдасына аяқтады. Бұл гейм барысында қазақстандық теннисші бір брейк істеді. Ал екінші сетті Елена 6:3 есебімен ұтты. Осылайша, Рыбакина финалға шықты. 

Енді Уимблдон турнирінің финалында отандасымыз әлемнің екінші нөмірлі теннисшісі Онс Жабермен кездеседі. Өз кезегінде тунистік теннисші жартылай финалда Татьяна Марияны 6:2, 3:6, 6:1 есебімен жеңді.