Кукушкин Истбурн турнирін жеңіспен бастады

Қазақстанның бірінші, әлемнің 90-ыншы ракеткасы Михаил Кукушкин Истбурн (Ұлыбритания) турнирін жеңіспен бастады.

Қазақстандық теннисші алғашқы кездесуінде рейтингте 77-інші сатыда тұрған австралиялық Алекс Де Минаурды 6:1, 6:2 есебімен қиналмай ұтты. Бір сағат 4 минутқа созылған бәсекеде М.Кукушкин төрт бірдей брейк жасай білді.

Михаил екінші айналымда осы турнирдің алтыншы ракеткасы болып тіркелген, рейтингте 38-інші орында тұрған испаниялық Давид Феррермен шеберлік байқасады. Жүлде қоры 770 695 АҚШ долларын құрайтын Истбурн жарысы 30 маусымда мәреге жетеді. Бұл Уимблдон турнирі алдындағы дайындық сынағы да болып есептеледі.

Еске сала кетейік, бұдан бұрын Юлия Путинцеваның әйелдер арасында Истбурн турнирінің алғашқы айналымынан аса алмағанын жазған болатынбыз.