Бүгін, 10 ақпанда Қазақстанның бірінші ракеткасы Елена Рыбакина (WTA №3) Катардың Доха қаласында өтетін WTA-1000 турниріндегі өнерін бастайды, деп хабарлайды Vesti.kz.
26 жастағы қазақстандық теннисші жарысты екінші айналымнан бастайды. Оның қарсыласы - қытайлық Ван Синьюй (WTA №33). Ван турнирдің алғашқы матчында колумбиялық Эмилиана Арангоны (WTA №49) 6:1, 7:5 есебімен ұтты.
Рыбакина мен Синьюй арасындағы кездесу Астана уақытымен 20:00-де басталады. Матчтың тікелей трансляциясын мына сілтеме арқылы көруге болады.
Бұл турнир Рыбакина үшін Australian Open-2026 жарысындағы жеңісінен кейінгі алғашқы бәсеке болмақ.
Қазіргі таңда Дохадағы турнирдің чемпионы (биылғы чемпион анықталғанға дейін) - америкалық теннисші Аманда Анисимова (WTA №4).
Елена Рыбакина 2025 жылғы жарыста ширек финалға дейін жетіп, сол кезеңде қазіргі әлемнің екінші ракеткасы саналатын польшалық Ига Швёнтекке жол берген болатын.
Qatar Open-2026 турнирінің жалпы жүлде қоры 4 088 211 АҚШ долларын (екі миллиард теңгеден астам) құрайды.
Турнир жеңімпазы 1000 WTA рейтингілік ұпайына қоса, 665 000 доллар көлемінде қомақты қаржылық жүлдені (327 миллион теңгеден астам) иеленеді.