WBA рейтингісі: Үздік ондыққа Ербосынұлы ғана енді
Дүниежүзілік бокс қауымдастығының (WBA) рейтингісі жаңартылды.
Супер орта салмақта жерлесіміз Айдос Ербосынұлы бірінші орында тұр. Ол сонымен қатар WBA International белбеуінің иегері. Бұл салмақтағы әдеттегі белбеу кубалық кіші Дэвид Моррельге тиесілі. Ал супер чемпион - мексикалық Сауль Альварес.
Жан Кособуцкий ауыр салмақта ТОП-15 тізімге енді (14-орын). Жеңілмеген қазақстандық боксшы соңғы жекпе-жегінде WBA International белбеуін жеңіп алды. Бұл салмақта британиялық Энтони Джошуа WBA титулының иегері. Әдеттегі чемпион атағы америкалық Тревор Брайанның еншісінде.
Бірінші ауыр салмақтағы Серік Мұсәділов ТОП-15-тегі орнын сақтап қалды (14-орын). Бұл салмақта WBA Super титулы франциялық Арсен Гуламирянға, әдеттегі белбеу бельгиялық Рияд Мерхиге тиесілі.
ТОП-15 қатарына Садриддин Ахмедов те енді. Ол бірінші орта салмақта 15-орында тұр. Бұл салмақта чемпион америкалық Джермелл Чарло. Әдеттегі белбеу кубалық Эрисланди Лараға тиесілі.
Бірінші жартылай орта салмақтағы рейтингте Батыр Жүкембаев 14-орынға жайғасқан. Бұл салмақта Ұлыбритания боксшысы Джош Тейлор супер чемпион, ал америкалық Марио Барриос чемпион.
Евгений Павлов екінші жеңіл салмақта 12-ші орында тұр. Бұл салмақтың чемпионы - өзбек Муроджон Ахмадалиев. Әдеттегі белбеу америкалық Брэндон Фигуераға тиесілі.
Загрузка матч-центра...
Жарнама