Ванес Мартиросян Головкинмен 5 мамыр күні жұдырықтасуға дайын екенін хабарлады

Ванес Мартиросян. Сурет: hayinfo.ru

Бірінші орта салмақта өнер көрсететін Арменияда дүниеде келген америкалық боксшы Ванес Мартиросян (36-3-1, 21 КО) орта салмақтағы WBC, WBA (Super), IBF және IBO тұжырымдары бойынша әлем чемпионы қазақстандық Геннадий Головкинмен (37-0-1, 33 КО) кездесуге дайын екенін айтты, деп хабарлайды LA Times.

Мартиросянның кандидатурасын WBC, IBF, WBA ұйымы мақұлдаған жоқ болатын. Бірақ боксшыны өзі шаршы алаңға шығып, допингпен ұсталған Сауль "Канело" Альварестің орнын басуға дайын екен.

"Мен шаршы алаңға шығуға дайынмын. Менен дүйсенбі күні сұраған кезде де, бірден келісім бердім. Тіпті сыйақы мәселесін қарастырған да жоқпын. Бұл Синко де Майо мерекесінде Лос-Анджелес үшін керемет мейрам. Армяндар аренаны толтырады. Менің мексикалық жанкүйерлерім де көп. Мен басқа боксшыларға қарағанды мықтымын. Головкинді жеңе аламын. Өйткені, ол мен сияқты боксшымен кездескен жоқ. Мен жаттығу, спарринг жасап, салмағымды сақтап жүрмін. Олар маған қашан қоңырау шалатынын күтіп жүрмін", - деді Мартиросян.

Еске салайық, Альварес кездесуден бас тартқаннан соң Головкин бәрібір 5 мамыр күні жекпе-жек өткізуге ниетті екенін айтты. Бірақ қарсылас әлі анықталған жоқ. Сондықтан да кеше жекпе-жектің өтетін күніне аз уақыт қалуына байланысты кездесу өтпей қалуы мүмкін деген ақпарат шықты. Отандасымыздың қарсыласы болуы мүмкін деген боксшылардың қатарында ирландиялық Гэри О’Салливан болған еді. Алайда оның өзі бүгін бас тартты.

Әлеуметтік желілерде бөлісу