Орта салмақтағы IBF және IBO белбеуінің иегері қазақстандық Геннадий Головкин (40-1-1, 35 КО) мен IBO белбеуінің міндетті қарсыласы Камил Шеремета (21-0, 5 КО) арасындағы кездесу қазан айында өтеді. Бұл туралы
Przegladsportowy.pl порталына польшалық боксшының промоутері Анджей Василевски айтты.
"Негізі жекпе-жек қазан айында өтеді. Бірақ бұған дейін кездесудің қашан өтетіні бірнеше рет өзгерді", - деді Василевски. Оның айтуынша, айқас АҚШ-та өтуі керек.
Бұған дейін Головкиннің өзі келесі кездесуін Шереметаға қарсы өткізетінін хабарлады. Қазақстандық боксшы дайындыққа да кірісіп кеткен.
Головкиннің жекпе-жегі әу баста ақпан айында өтуі керек еді. Кейін наурызға шегерілді. Өйткені, жаттығу кезінде Головкин жарақат алып қалды. Сосын пандемияға байланысты кездесу жыл соңына қалған болатын.