Сергей Ковалев Головкин - "Канело" жекпе-жегіне болжам жасады

Ресейлік боксшы Сергей Ковалев қыркүйекте өтуі мүмкін деген Геннадий Головкин мен мексикалық Сауль "Канело" Альварес жекпе-жегіне қатысты пікірін білдірді. 

"Қазір бұл жекпе-жектің жарнамасы жақсы жүріп жатыр. Бұлай тағы бір немесе екі жыл болатын шығар. Әрине, біз барлығымыз бұл жекпе-жектің қазір өткенін қалап отырмыз. Бірақ Пакьяо мен Мейвезер жекпе-жегін еске алыңыз. Оның жарнамасы сегіз жыл жүрді. Сегіз жыл! Дегенмен менің ойымша Головкин мен "Канелоның" кездесуі максимум екі жылдың ішінде өтеді. Кім жеңеді деген сауалға келетін болсам. Мен нақты жауап бере алмаймын. 50 де 50 дер еді", - деп келтіреді Ковалевтің сөзін FightHub TV. 

Еске салайық, 6 мамыр күні Лас-Вегаста "Канело" отандасы кіші Хулио Сезар Чавеспен (50-2-1, 32 КО) кездесу өткізеді. Жекпе-жек 164,5 фунтта өтіп, WBC тұжырымының чемпиондық белбеуі сарапқа салынады. 

Бұған дейін Альварес осы жекпе-жектен кейін Головкин өнер көрсететін орта салмаққа ауысатынын хабарлаған еді. Головкин мен "Канело" жекпе-жегі қыркүйек айында өтуі мүмкін деп жоспарлануда.