Рио Фердинандқа боксшы лицензиясын беруден бас тартылды

Англия құрамасы мен «Манчестер Юнайтед» командасының бұрынғы ойыншысы Рио Фердинанд кәсіпқой боксшы бола алмайды, – деп хабарлайды BBC.

Британияның бокс комитеті 39-жастағы спортшы кәсіпқой боксшының лицензиясын беруден бас тартқан.

"Кәсіпқой боксшы лицензиясын бермей қойғанын ауыр қабылдадым. Жүрегім ауырып, қолғабымды шегеге ілдім", – деді Рио Фердинанд комитеттің шығарған шешіміне.

Футболшы мансабын аяқтағаннан кейін, 2 жыл бойы бокспен шұғылданған Рио Фердинанд шаршы алаңда бір ғана жекпе-жек өткізуді қалайтынын айтты. Ол өз сөзінде: «Маған алдымен лицензия алып, нағыз кәсіби боксшы бола аламын ба соны анықтау маңызды болып тұр. Мен бокстағы ұзақ мансапты қаламаймын. Мен бір жекпе-жек өткізгім келеді, сосын ары қарай көреміз. Бәлкім, бокс маған ұнап, осы спортты серік етуім мүмкін. Бұл бейжай қарайтын жайт емес. Лицензияма қол жетізіп, бокстағы атымды қалыптастырамын деп ойлаймын», – дейді Рио Фердинанд.

Айта кетейік, осы уақытқа дейін UFC файтері Конор МакГрегор кәсіпқой бокста өнер көрсету мәртебесіне ие болып, алғашқы кездесуін атақты Флойд Мейвезерге қарсы өткізген болатын.

Әлеуметтік желілерде бөлісу