Мэнни Пакьяо Кроуфорд-Хорн кездесуінің андеркартында жұдырықтаспайды

©:allboxing.ru

Сегіз салмақ бойынша әлемнің бұрынғы чемпионы филипиндік Мэнни Пакьяо сәуір айында жекпе-жек өткізбейтін болды. Бұл туралы Ringtv.com порталына Пакьяоның Филиппин сенатында баспасөз хатшысы Зонио Аквилес айтып берді.

Еске салайық, бұған дейін Пакьяоның 14 сәуір күні жартылай орта салмақтағы WBO белбеуінің иегері автсралиялық Джефф Хорн мен бұл белбеудің міндетті қарсыласы, әлемнің бұрынғы абсолютті чемпионы Теренс Кроуфорд арасында өтетін бокс кешінің андеркартында шығады деген мәлімет шыққан болатын.

Зонио Аквилестің айтуынша, Пакьяо бокс кешінің андеркартында шығуға қарсы екен. Ол тек кештің басты жекпе-жегінде шаршы алаңға шығуға ниетті.

"Сенатор Пакьяо Кроуфорд-Хорн бокс кешінің андеркартында шаршы алаңға шықпайды. Бұл Пакьяо үшін масқара дүние!", - деді баспасөз хатшы.

Айта кетейік, өткен аптада филиппиндік боксшының бапкері Фредди Роуч Пакьяоға бірнеше рет қоңырау шалып, онымен байланысқа шыға алмағанын айтты. Сонымен қатар ол Пакьяоның да келесі кездесуіне қашан дайындалатынын білмейтінін айта кетті.

Әлеуметтік желілерде бөлісу