"Менің залымда әлі екі чемпион бар" - Санчес Головкин мен Гассиевтің бірінші рет жеңілуі жайлы

Гассиев, Головкин және Санчес. © RingTV

Танымал бапкер Абель Санчес биыл оның залындағы екі жұлдыз да жеңіліп қалғанына қатысты еш алаңдамайтынын айтады. - деп хабарлайды BoxingScene.com.

Биыл шілдеде Мурат Гассиев (26-1, 18 КО) Бүкіләлемдік бокссуперсериясын (WBSS) финалында бірінші ауыр салмақта украиналық Александр Усикпен (15-0, 11 КО) жұдырықтасып, төрешілер шешімімен жеңіліс тапты. Соның нәтижесінде Александр Усик WBC, WBA (Super), WBO, IBF белбеулерінің басын қосып, абсолют чемпион атанды.

Қыркүйекте Лас-Вегаста қазақстандық Геннадий Головкин орта салмақта мексикалық Сауль "Канело" Альвареспен екінші кездесу өткізіп, төрешілер шешімі бойынша жеңіліс тауып, WBC, WBA (Super) және IBO белбеулерінен айырылып қалды.

Big Bear лагерінде Абель Санчес жаттықтыратын Головкин үшін де Гассиев үшін де бұл спорттық мансабындағы бірінші жеңілісі. Санчес бұл мәселеге неліктен алаңдамайтынын түсіндірді: "Еш алаңдамаймын. Менің залымда жеңіс көрсеткіші 92 пайызға тең. Головкин нокаутқа түсіру көрсеткіші бойынша ең үздік нәтиже көрсетті, 20 рет белбеулерді қорғады. Гассиев болса финалға дейін жетіп, ең мықтымен жұдырықтасты. Біздің сәттілігіміз жүйемізге байланысты. Менің залымда әлі екі чемпион бар".

Әлеуметтік желілерде бөлісу