Америкалық Джои Давейко (21-9-4, 12 КО) WBA International белбеуі үшін кездесуде қазақстандық Жан Кособуцкий (16-0, 15 КО) "лас" әдіс қолданды деп айыптады. Vesti.kz тілшісіне берген сұхбатында ол қарсыласының бұл әрекеті жекпе-жекке құрған жоспарына кедергі келтіргенін айтты.
Гамбургте (Германия) өткен бокс кешінде Жан Кособуцкий (16-0, 15 КО) қарсыласын екінші раундта нокаутқа түсіріп, WBA International белбеуін қорғап қалды. Жекпе-жектен кейін Давейко отандасымызды лас әдіс қолданды деп айыптады. Бірақ шетелдік БАҚ америкалық боксшының бұл мәлімдемесін жоққа шығарды.
"Бұл көпшіліктің назарын аударатын жақсы кездесу болатын еді. Кособуцкий мықты қарсылас. Біз мықты шоу көрсететін едік. Өкінішке қарай, ол әділ жұдырықтаспады. Ол менің желкемнен бір емес, бірнеше мәрте ұрды. Осыдан кейін мен шамалы шашырап қалдым. Бірақ нокдаун болмады. Осы сәтті ол жақсы пайдаланып, денемнен біраз соққы өткізді.
Мен оны жеңіп кететін едім деп айтқым келмейді. Алайда ол әділ жұдырықтасқанда жекпе-жек қызық өтетін еді. Қолдау білдірген барлық жанкүйерге алғыс айтамын. Ал қарсыласыма сәттілік тілеймін. Егер біз екінші рет кездессек, айқас мүлде басқаша болады", - деді Давейко.
Айта кетейік, Давейкомен кездесу Кособуцский үшін Гамбургте өткізген үшінші жекпе-жек болды. Бұған дейін ол осы қалада 2019 жылы хорват Агрон Смакичиді (16-1, 14 КО), 2021 жылы нигериялық Онориод Евариемені (18-2, 17 КО) нокаутпен жеңді.