Кәсіпқой бокстағы қазақ боксшылары жекпе-жектерін қашан өткізеді?

Бүгін Қазақстанның қос кәсіпқой боксшысы шаршы алаңға шығады. Атап айтсақ, Ресейдің Сочи қаласында Иса Ақпербаев Украинаның мықтысы Юрий Барашьянмен күш сынасса, АҚШ-тың Детройт қаласында Бақтияр Эюбов жергілікті өрен Сонни Фредриксонмен жұдырықтасады.

Жоғарыда есімдері аталған боксшылардың барлығының да спорттық мансаптары жарқын жеңістерге толы. Бірінші ауыр салмақта жұдырықтасатын 29 жастағы Қостанай қаласының тумасы Иса Ақпербаев 18 кездесу өткізіп, 17 рет басымдық танытты. 13 қарсыласын нокаутқа жіберді. Тағы бір бәсекенің нәтижесі есепке алынбады. Исаның қарсыласы өте тәжірибелі. 37 жастағы Юрий Барашьян 37 рет рингке көтеріліп, 28 рет жеңіске жетті. 19 жекпе-жекті мерзімінен бұрын аяқтады. Қос саңлақ WBA Asia West нұсқасының алтын белбеуі үшін таласады.

Жартылай орта салмақтағы Бақтияр Эюбовтің өзі де, қарсыласы да осы күнге дейін ешкімнен жеңіліп көрген емес. Ақтөбенің 30 жастағы сақа спортшысы 13 кездесудің 11-інде айқын басымдыққа ие болды. 23 жастағы Сонни Фредриксон 17 бәсекенің 11-інде бәсекелесін есінен тандырды.

19-тамызда АҚШ-тың Техас штатында Әли Ахмедов жергілікті боксшы Кертис Хилмен айқасады. Жартылай ауыр салмақтағы қос мықты да ешкімге есе жіберген емес. Алматы облысының өкілі 7 кездесудің 5-уін нокаутпен аяқтаса, қарсыласы 10 бәсекенің тең жартысында айқын жеңіске қол жеткізді. Олар WBC Youth World (жастар арасындағы әлем чемпионы) нұсқасының алтын белбеуін сарапқа салады.

26-тамызда Фируза Шәріпова шаршы алаңға шығады. Тараздың ару WBA International нұсқасының алтын белбеуі үшін таласады.

9 -қыркүйекте Астанада кәсіпқой бокс кеші өтетіні белгілі. Сол кештің басты жекпе-жегінде бірінші орта салмақтағы (69 келі) WBO NABO және WBA Inter-Сontinental нұсқаларының алтын белбеу иегері Қанат Ислам канадалық Брэндон Кукпен күш сынасады. Сондай-ақ, Димаш Ниязов, Жанқош Тұраров, Айдос Ербосынұлы, Мейірім Нұрсұлтанов, Нұрсұлтан Жанабаев , Жәнібек Әлімханұлы, Әли Ахмедов және Руслан Мырсатаев сынды саңлақтар жарыс көрігін қыздырады.

16-қыркүйекте төрткүл дүние жанкүйерлері тағатсыздана күтіп отырған мәні де, маңызы да айрықша жекпе-жек өтеді. Атап айтсақ, АҚШ-тың Лас-Вегас қаласында қазақстандық Геннадий Головкин (37-0-0, 33 КО)  мен мексикалық Сауль Альварес (49-1-1, 34 КО)  айқасады. Оларды көпшілікпен таныстырып жатудың өзі артық. Екеуінің де даңқы әлдеқашан алысқа тараған. Осы жекпе-жекте WBC, WBA (Super), IBF және IBО тұжырымдарының алтын белбеуі сарапқа салынады. Әңгімені қысқа қайырсақ, осы бәсекеде орта салмақтағы әлемнің ең үздік былғары қолғап шебері анықталады. Осы жекпе-жектің андеркартында тағы бір қазақстандық өрен Бобыржан Момынов өнер көрсетеді.

Міне, осы және қыркүйек айында Қазақстан боксшыларының қатысуымен өтетін қызықты жекпе-жектер осылар.