"Канело" Головкинмен жекпе-жек алдындағы жаттығу тәртібін жария етті

Мексикалық кәсіпқой боксшы Сауль "Канело" Альварес қазақстандық Геннадий Головкинмен жекпе-жекке дайындалу үшін Сан-Диегодағы жаттығу лагеріне оралды, - деп хабарлайды ESPN.

Осыған байланысты "Канело" өзінің күн тәртібі мен жаттығу кестесін жариялады:

- 6:00-дан 6:30-ға дейін жүгіру;
- Жүгіргеннен кейін таңғы ас, кейін демалыс;
- Залда жаттығар алдында жеңіл түскі ас;
-  Дүйсенбі, сәрсенбі және жұма күндері 14:00-ден 17:00-ге дейін  - физикалық жаттығулар, соққыны жаттықтыру, секіру және тағы басқасы;
- Сейсенбі, бейсенбі және сенбіде спарринг-сессиялар.

Мұның алдында Альварес жаттығулары қалыпты тәртіпте өтіп жатқанын, бірақ, қарсыласына қатысты өзгеріп тұратынын мәлімдеген. Сонымен бірге, мексикалық боксшы Головкиннің барлық тісін қағып аламын деген супер орта салмақтағы боксшыны спарринг серіктес ретінде шақырды. Жуырда Альварес қазақстандық боксшы Бобиржан Момыновпен спарринг өткізді. Қазақстандық боксшы Альварестің істерімен айналысатын Golden Boy Promotions компаниясымен келісімшарт жасасуы мүмкін екенін айта кетейік.

Ал Головкин-Альварес жекпе-жегі 16 қыркүйекте Лас-Вегастағы 20 мың адам сиятын T-Mobile аренасында болады.