ESPN арнасының комментаторы әрі спорт журналисі Армандо Мендоза Vesti.kz тілшісіне берген сұқбатында қазақстандық боксшы Тұрсынбай Құлахметтің (4-0, 3 КО) алдағы демалыс күні доминиканалық Хуан Карлос Абреумен (23-6-1, 21 КО) өткізетін кездесуі туралы ойымен бөлісті. Әңгіме барысында ол Абреудің карьерасына тоқталып, 29 қазан күні Лондон (Англия) қаласында нокаут бола ма, жоқ па деген сауалға жауап берді.
"Хуан мықты боксшы. Ол өте шыдамды жігіт. Өкінішке қарай, оның карьерасы біз қалағандай мықты болмады. Абреу өз дивизионының басты жұлдыздарының бірі болуы мүмкін еді. Алайда кейбір жағдайлар оған кедергі жасады. Қазір ол орта деңгейдегі боксшы болып қалды. Дегенмен Хуан тосынсый жасауы әбден ықтимал. Алдағы жекпе-жекте ол қарсыласын нокаутқа түсіруі немесе өзі нокаутқа түсіп қалуы мүмкін.
Бұған дейін ол мықты қарсыластарды жеңіп көрген. Қазақстандықтың шамасы қандай екенін енді байқап көреміз. Құлахмет бұл кездесуді жеңсе, үлкен кездесулерге жолы ашылады. Негізі мен оны болашақта жұлдыз болатын боксшы деп есептеймін", - деді Мендоза.
Еске салайық, Құлахмет әуесқойлар арасында 2019 жылғы Азия чемпионы. Дәл сол жылы ол әлем чемпионатының қола жүлдегері атанған. Кәсіпқой бокстағы соңғы кездесуін ол 10 шілде күні Алматы қаласында өткізіп, оныншы раунда ресейлік Алексей Евченконы (19-15, 8 КО) техникалық нокаутпен жеңді.