Ислам рингте Головкин секілді дөрекі жұдырықтасуы қажет - америкалық журналист

Сурет fightnews.com сайтынан

Американың Delcotimes.com сайтының журналисі Джэк МакКафери Vesti.kz басылымына берген сұхбатында қазақстандық кәсіпқой боксшы Қанат Исламды (23-0, 19 КО) WBA (Super), IBO, WBC және IBF тұжырымдары бойынша орта салмақтағы әлем чемпионы отандасы Геннадий Головкинмен (36-0, 33 КО) салыстырды.

- Қанат Исламның соңғы жекпе-жегін көрдім. Қолы жылдам қимылдайды, нағыз жауынгер секілді жұдырықтасады. Ол маған қатты әсер қалдырды. Ислам чемпион болады, - деп бастады сөзін МакКафери.

- Қалай ойлайсыз, Қанат пен "Канело" арасындағы жекпе-жек қызық болады ма?

- Иә, бұл жекпе-жекті көргім келеді. Дәл қазір Ислам мен "Канелоның" кездесуі орынсыз болар еді дегенге келіспеймін. Дегенмен қазақстандық былғары қолғап шебері келесі жекпе-жегін дәл осы мексикалық боксшыға қарсы өткізуі қажет деп те есептемеймін. Әлемдік деңгейдегі боксшылармен жұдырықтасуға әлі ерте.

- Қанат Ислам "Канелоны" жеңеді деп ойлайсыз ба?

- Ислам біреумен бәсекеге түсе алатын дарынды боксшы. "Канелодан" жеңіледі деп кесіп айта алмаймын. Оның жеңіп кетуі мүмкін. Қазақстандық боксшы соңына дейін жұдырықтаса алады.

- Исламның соңғы кездесуінен кейін сіз оны Генннадий Головкинмен қайта салыстыра бастадыңыз...

- Иә, барлық қазақстандық боксшылардың бір ұқсастығы бар - олар қарсыластарынан қорықпайды. Соңғы жекпе-жекте Ислам GGG сияқты дөрекілеу болды. Ол осы қалпында жалғастыра берсе, чемпион болуы әбден мүмкін", - деді америкалық журналист.

Әлеуметтік желілерде бөлісу