Ислам мен Кук арасындағы кездесуде төрешілер әділ болады деп үміттенемін - канадалық сарапшы

Танымал канадалық бокс сарапшысы Шон Смит Vesti.kz порталының тілшісіне Астана қаласында өтетін Қанат "QAZAQ" Ислам 24-0, 19 КО) мен Брэндон Кук (18-0, 11 КО) арасындағы кездесуде төрешілер әділ болатынына үмітті екенін айтты.

"Менің ойымша, бізді жақсы жекпе-жек күтіп отыр. Жеңімпаз WBA ұйымының чемпиондық белбеуіне бір табан жақындай түседі. Бұл жекпе-жекпе болжам жасау мен үшін қиындау болып тұр. Қанат Ислам - өте мықты боксшы. Бірақ Кук те осал емес, алайда, оның тәжірибесі аз.

Қанат Исламның бұған дейінгі жекпе-жектерінен қарап отырып қорытынды шығаратын болсақ, Брэндон оның ең мықты қарсыласы екен. Бұл "QAZAQ" үшін де Кук үшін де үлкен сынақ болайын деп тұр. Мен тек төрешілер әділ болады деп үміттенемін. Өйткені, кәсіпқой бокста төрешілердің қателігі жиі кездесіп жатады. Сондықтан да мұндай керемет жекпе-жекті төрешілердің шешімі бұзып тастамаса екен", - дейді Смит.

Еске салайық, Қанат Ислам мен Брэндон Кук арасындағы кездесу 9 қыркүйек күні елордамыз Астана қаласында өтеді. Канадалық боксшы өзінің соңғы кездесін отандасы Стивен Батлерге қарсы өткізіп, нокаутқа түсірген болатын.

Қанат Ислам болса өзінің соңғы кездесуін 26 мамыр күні мексикалық Норберто Гонсалеске қарсы өткізіп, 12 раундтың қорытындысы бойынша төрешілердің шешімімен жеңіске жетті. Сөйтіп орта салмақтағы WBO NABO және WBA Inter-Сontinental тұжырымы бойынша чемпиондық белбеулерін жеңіп алды. Қазіргі уақытта отандасымыздың еншісінде 24 кездесу бар және боксшымыз оның барлығында жеңіске жеткен. 19 кездесуде ол қарсыластарын нокаутқа жіберген.

Әлеуметтік желілерде бөлісу