Гонсалес пен Брекхус Головкин мен "Канело" арасындағы кездесудің андеркартында өнер көрсетеді

Сурет Брекхустың Facebook парақшасынан алынды.

Никарагуалық боксшы Роман "Чоколатито" Гонсалес (46-2, 38 КО) пен норвегиялық Брекхус (32-0, 9 КО) қазақстандық Геннадий Головкин (37-0-1, 33 КО) мен мексикалық Сауль "Канело" Альварес (49-1-2, 34 КО) арасында өтетін екінші жекпе-жектің андеркартында өнер көрсетеді. Бұл туралы отандасымыздың промоутері Том Леффлер айтып берді.

Гонсалес пен Брекхустың бұл шоуда өнер көрсететіні туралы ресми алдағы екі аптаның ішінде ресми хабарланады. Олардың қарсыластары әлі анықталған жоқ.

30 жастағы Гонсалес төрт салмақта әлем чемпионы атанған. 2015 жыл мен 2017 жыл аралығында ол салмақ дәрежесіне қарамастан жасалатын The Ring журналының P4P рейтингінде бірінші орында тұрған. Бұған дейін Гонсалес 46 кездесуде қатарынан жеңіліссіз келген болатын. Бірақ 2017 жылдың наурыз айында оны тайландтық боксшы Срисакет Сор Рунгвисаи (45-4-1, 40 КО) жеңіп, WBC белбеуін тартып алды. Кейін бұл боксшылар өткен жылдық қыркүйек айында да кездесіп, бұл жолы да Рунгвисаидың пайдасына аяқталды.

36 жастағы Брекхус үшін бұл АҚШ жеріндегі екінші жекпе-жегі болмақ. Ол АҚШ-тағы бірінші кездесуін 2008 жылы өткізген. Норвегиялық боксшы жартылай орта салмақтағы WBC, WBA, WBO, IBF және IBO белбеулерінің иегері. 2014 жылы ол қыздар арасында бірінші болып әлемнің абсолютті чемпионы атанды. Қазір бокс тарихындағы абсолютті чемпион болған төрт боксшының қатарына кіреді.

Айта кетейік, Гонсалес бұған дейін Головкиннің қатысуымен өткен бокс кешінде бірнеше рет жұдырықтасқан. Ал Брекхус болса ағайынды Кличколар басқаратын K2 Promos промоутерлік компаниясының боксшысы.

Головкин мен Альварес арасындағы екінші кездесу 5-мамыр күні Лас-Вегастағы T-Mobileв спорт кешенінде өтеді.Олардың бірінші кездесуі де Лас-Вегаста өтіп, тең аяқталған еді.

Әлеуметтік желілерде бөлісу