Жартылай орта салмақта өнер көрсететін өзбекстандық боксшы Шохжахон Эргашев (21-0, 19 КО) карьерасын аяқтайтынын хабарлады, деп жазады Vesti.kz тілшісі.
Бұл туралы боксшы Instagram парақшасында жазды. "Үйде ұзақ уақыт болмадым. Сосын әкем үйге кел деді. Келгеннен кейін әкеммен ұзақ сөйлесіп, мен жүріп өткен жолымды еске түсірдік. Қазір менің жасым 29-да. Бірінші рет әкем карьерамды аяқтауымды сұрады. Барлығының соңы бар секілді, спорт та мәңгілік емес. Мені қолдаған барлық адамдарға алғыс айтамын. Өмірімнің жаңа бір парағын ашудамын. Мен боксты толық тастап кетпеймін. Бір күні шаршы алаңға өзім үшін қайта шығатын шығармын. Басқа бір шаруада өзімді сынап көргім келеді. Бірақ бұл спорт болмайды. Барлықтарыңызға сәттілік", - деп мәлімдеді Эргашев.
Ал инсайдер әрі агент Рик Глейсердің ақпараты бойынша, Эргашев карьерасын басқа себепке байланысты аяқтады. "Негізі себеп басқа нәрседе. Ол Salita Promotions компаниясының келісімшраты бойынша жекпе-жек өткізгісі келмейді", - деп келтіреді Глейстердің сөзін vRINGe.com порталы.
Еске салайық, бұған дейін Эргашевтің промоутері боксшы қазақстандық чемпион Геннадий Головкиннің (41-1-1, 36 КО) орнын басады деген болатын.