Головкин Мейвезер - МакГрегор кездесуін көрмегенін айтты

©boxingscene.com

Орта салмақтағы WBA (Super), IBO, WBC және IBF тұжырымдары бойынша әлем чемпионы қазақстандық Геннадий Головкин (37-0, 33 КО) бес салмақ бойынша бокстан әлемнің бұрынғы чемпиона америкалық кіші Флойд Мейвезер мен жеңіл салмақта UFC чемпионы ирландиялық Конор МакГрегор арасындағы кездесуді көрмегенін айтты.

Мейвезер мен МакГрегор арасындағы кездесу 27 тамыз күні Лас-Вегастағы 20 мың жанкүйерге арналған T-Mobile спорт кешенінде өтті. Бұл кездесудің 10 раундында Мейвезер техникалық нокаутпен жеңіске жетті. Бейресми мәлімет бойынша, жекпе-жектің ұйымдастырушылары кездесуден 600 миллион доллар көлемінде пайда түсіріпті.

"Мейвезер - МакГрегор кездесуі туралы не ойлаймын дейсіз бе? Шынымды айтсам, бұл жекпе-жек туралы ештеме ойламаймын. Өйткені, мен НВО арнасын көремін (Мейвезер - МакГрегор кездесуін Showtime арнасы көрсетті). Сондықтан кешірім сұраймын. Мүмкін келер аптада көретін шығармын", - дейді Головкин Лос-Анджелесте өткізген ашық жаттығу кезінде Fight Hub TV арнасына берген сұқбатында.

Еске салайық, Головкиннің өзі 16 қыркүйек күні T-Mobile спорт кешенінде мексикалық Сауль "Канело" Альвареске (49-1-1, 34 КО) қарсы кездесуде өзінің барлық белбеулерін қорғайды. Қазіргі уақытта жекпе-жектің барлық билеттері саталып кеткен. Бұл бокс кешінде ақылы көрсетілетін жекпе-жектердің де тізімі жасақталып қойған.

Әлеуметтік желілерде бөлісу