Орта салмақтағы WBA (Super), IBO, WBC және IBF тұжырымдары бойынша әлем чемпионы қазақстандық Геннадий Головкин (37-0, 33 КО) мен мексикалық Сауль "Канело" Альварес (49-1-1, 34 КО) IBF ережесі бойынша жекпе-жек күні салмақ өлшемейтін болды, деп хабарлайды Boxingscene.com порталы.
Сайттың таратқан мәліметі бойынша, өткен аптада Халықаралық бокс федерациясының (IBF) ережелеріне өзгеріс еніпті. Жаңа заң бойынша енді боксшылар жекпе-жек күні салмақ өлшемейді. Бірақ жекпе-жекке қатысатын боксшылар бекітілген салмақтан 10 фунтқа асып кетпеу керек.
Дәл осындай ереже бойынша өткен аптаның соңында Теренс Кроуфорд пен Джулиус Индонго да жекпе-жек өткізді. Бұл кездесуде кәсіпқой бокс әлеміндегі белді деген төрт ұйымның (WBA, WBC, WBO және IBF) белбеулері сарапқа салында. Алайда екі боксшы IBF ережесі бойынша жекпе-жек күні салмақ өлшемеді.
"Мамыр айында Халықаралық бокс федерациясының отырысында біз бірнеше ережені өзгерттік. Олардың қатарында салмақ өлшеу мәселесі де бар. Енді боксшылар жекпе-жек күні міндетті түрде салмақ өлшемейді", - дейді IBF президенті Дэрил Пиплз Boxingscene.com порталына берген сұқбатында.
Еске салайық, Головкин мен Альваресті допингтен VADA ұйымы тексерген. Еске салайық, бұл екі боксшы арасындағы жекпе-жек 16 қыркүйек күні Лас-Вегастағы (АҚШ, Невада) T-Mobile Arena аренасында өтеді. Сауль Канело Альвареске қарсы жекпе-жекте Геннадий Головкин орта салмақта WBC, WBA (Super), IBF және IBO чемпиондық атақтарын қорғайды. Мексикалық "The Ring" журналының белбеуін бәске тігеді.
Жарнама