Головкин келесі жекпе-жегін Қазақстанда өткізетінін растады

Орта салмақта WBA (Super), IBO, WBC және IBF тұжырымдары бойынша әлем чемпионы қазақстандық боксшы Геннадий Головкин (36-0, 33 КО) келесі кездесуін Қазақстанда өткізетінін растады, деп хабарлайды Vesti.kz порталы.

- Менің білуімше, сіз келесі кездесуіңізді Қазақстанда өткізгіңіз келеді. Бұл сіз үшін қаншалықты маңызды?

- Иә, рас. Мен келесі кездесуімді өз отанымда өткізгім келеді. Өйткені, Қазақстанда менің жекпе-жегімді көргісі келетін жанкүйерлер өте көп. Бұл қазақ боксы үшін тарихи оқиға болар еді. АҚШ-та кәсіпқой бокс қарқынды дамып кеткен. Қазақ жанкүйерлері де кәсіпқой бокстың қаншалықты мықты екенін көргісі келеді, - дейді Головкин Джейкобспен өтетін кездесудің алдындағы баспасөз жиыны барысында.

Айта кетейік, бұған дейін БАҚ өкілдері Головкин өзінің келесі кездесуін жазда Қазақстанда EXPO-2017 кезінде өткізетінін айтқан еді. Тіпті кейбір БАҚ бұл жекпе-жектің 10 маусымда өтетінін жазды. Ал оның қарсыласы орта салмақтағы WBO тұжырымының чемпионы Билли Джо Сондерс (24-0, 12 КО) болады-мыс.

Өз кезегінде EXPO-2017 ұйымдастырушылары да жазда қазақстандық бокс жұлдыздарының қатысуымен бокс кешін өткізетінін растады. Дегенмен боксшылармен әлі нақты келісімге келмегенін тілге тиек еткен.

Еске салайық, Головкин - Джейкобс жекпе-жегі 18 наурызда Нью-Йоркте өтеді. HBO арнасы бұл жекпе-жекті ақылы трансляциялар жүйесі (PPV) арқылы көрсетеді. Қазақстанда жекпе-жекті "Қазақстан" және KazSport арналары көрсетеді. Трансляцияның басталуы 19 наурызда 08:00-де.

Әлеуметтік желілерде бөлісу