Бейбіт Шүменов бапкерін ауыстырды

Бірінші ауыр салмақтағы WBA тұжырымы бойынша әлем чемпионы Бейбіт Шүменов (17-2, 11 КО) кәсіпқой бокста бірінші ірі жетістігіне қол жеткізген бапкерімен қайта жұмыс істеп бастады. Бұл туралы қазақстандық боксшының өзі Instagram парақшасында хабарлады.

"Кевин Барримен қайта бірге жұмыс істейтінімен қуаныштымын. Бұл бапкер маған 2010 жылы кәсіпқой бокстағы бірінші әлем чемпионы атағын жеңуге көмектескен маман. Сонымен қатар ауыр салмақта WBO тұжырымы бойынша әлем чемпионы Джозеф Паркер, жартылай ауыр салмақтағы IBO тұжырымы бойынша әлем чемпионы Умар Саламов секілді жаңа командаластарыммен танысқаныма қуаныштымын", - деп жазба қалдырды Шүменов.

Кевин Майкл Джозеф Барри - жаңазеландиялық бапкер, менеджер және бұрынғы боксшы. Қазақстандық боксшы бұл маманмен 2010 жылы бірге жұмыс істеп, ауыр салмақтағы WBA тұжырымының әлем чемпионы атағын жеңіп алды.

Қазіргі уақытта Шүменов WBA тұжырымы бойынша әлем уақытша чемпионы үшін кубалық Юниэр Дортикоспен өтетін кездесуге дайындалып жатыр. Негізі бұл екі боксшы арасындағы жекпе-жек 11 ақпан күні өтуі керек еді. Бірақ Дортикостың жұмыстарымен айналысатын Caribe Promotions промоутерлік компаниясы аталған жекпе-жекті өткізетін құқықтан айырылып қалды.

Енді бұл кездесуді өткізу құқығы TGB Promotions компаниясының менеджері Том Браунға өтті.

Айта кетейік, Шүменов пен Дортикос арасындағы кездесудің жеңімпазы WBA тұжырымы бойынша әлемнің суперчемпионы ресейлік Денис Лебедевпен кездесуге мүмкінді алады.

Әлеуметтік желілерде бөлісу