"Арландар" WSB жобасының жаңа маусымда қалай өнер көрсетіп жатыр?

Бүкіләлемдік әлем бокс сериясы (WSB) жетінші маусымындағы барлық бес топта топтық кезеңнің бірінші айналымы аяқталды. Бірінші айналымның қорытындысы бойынша елордалық "Астана арландары" клубы Азия аймағындағы командалардың көшіп бастап тұр. Біздің команда бірінші айналымда өткізген үш кездесудің барлығында жеңіске жетті. Ал команданың кейбір боксшылары жеке көрсеткіштерін жақсартып алды, деп жазады Vesti.kz порталы.

Қазіргі уақытта "Астана арландары" клубының еншісінде тоғыз ұпай бар. Біздің топта екінші келе жатқан "Ресей патриоттарынан" елордалық ұжым бес ұпай алда келеді.

Жалпы үш турдың қорытындысыс бойынша қазақ боксшылары жобада 15 жекпе-жек өткізді. Оның тек үшеуінде ғана біздің боксшылар жеңілістің кермек дәмін татты. Екі рет ресейлік боксшылардан жеңілсе, бір рет өзбек боксшыларына жол берді. 

Егер келесі турда "Астана арландар" Тараз жерінде "Ресей патриоттарынан" үстем түсетін болса, онда командамыз плей-офф кезеңіне шығады. Өйткені, "арландарды" басқа ұжымдар ұпай саны бойынша қуып жете алмайды. 

Енді жобаның рейтингіне тоқталар болсақ. Бұл жерде де қазақ жанкүйерлері үшін қуанышты жаңалықтар бар. 

Ең жеңіл салмақта өнер көрсететін Теміртас Жүсіпов биылғы маусымда екі кездесу өткізіп, екеуінде де жеңіске жетті. Осылайша алты ұпай жинаған Теміртас жоба рейтингінің үшінші сатысына орналасыпты. 



Командамыздың капитаны Олжас Сәттібаев биыл бір кездесуде жеңіске жетіп, ол да үшінші орынға жайғасқан. Дегенмен, бұл салмақтағы рейтингтің көшін бастап тұрған боксшылардың еншісінде де Олжаспен бірдей ұпай бар.



Ілияс Сүлейменовтың көрсеткіші де көңілден шығып тұр. Ол "арландар" сапында екі кездесу өткізіп, екеуінде де жеңіске жетті. Осылайша ол рейтингте екінші сатыға табан тірепті. Бұл салмақта бірінші орын өзбек өрені Абдулай Шарахмовтың еншісінде. Оның да Ілияспен ұпайы бірдей. 

Зәкір Сафиуллин екінші орын (бір жеңіс, бес ұпай), Ділмұрат Мижитов үшінші орындарға (екі жеңіс, алты ұпай) жайғасса, Алсанбек Шымбергенов үшінші орында тұр. 



Қазақстандық боксшылар арасында үздік көрсеткіш Антон Пинчукқа тиесілі. Ауыр салмақтағы боксшымыз биыл екі кездесуі өткізіп, екеуінде де жеңіске жетіп, рейтингтің көшін бастап тұр. Оның еншісінде 10 ұпай бар. 



Айта кетейік, "Астана  арландар" жоба аясындағы келесі кездесуін 18 наурыз күні Тараз төрінде "Ресей патриоттарына" қарсы өткізеді. Vesti.kz порталы бұл жекпе-жек кешін тікелей эфирде көрсетеді. Тікелей эфирді мына сілтеме бойынша көре аласыздар.