Әр кездесуімнен кейін Президентіміз бен халқымыздың құттықтауын алуға бақыттымын - Қанат Ислам

Бүгін Астанада Қазақстан Республикасы Мәдениет және спорт министрі Арыстанбек Мұхамедиұлының кәсіби боксшы, бірінші орта салмақтағы WBA Fedecaribe,  WBA Fedelatin және WBO Intercontinental  титулдық атақтарының иегері Қанат Исламмен кездесуі өтті, деп хабарлайды Vesti.kz тілшісі ҚР Мәдениет және спорт министрлігінің баспасөз қызметіне сілтеме жасап.

Сонымен қатар кездесуге танымал отандық меценат, Қазақстанда спорт дамуына қамқорлық білдіріп жүруші Бауыржан Оспанов, ҚР МСМ Спорт және дене шынықтыру істері комитетінің төрағасы Елсияр Қанағатов, ҚР МСМ Туризм индустриясы комитеті төрағасының м.а. Марат Игали қатысты.

Мәдениет және спорт министрі қазақстандық былғары қолғап шеберін үстіміздегі ақпанда Бразилияның спортшысы Робсон Ассиске қарсы кездесуде жеткен жеңісімен құттықтады.

«Біз, қазақстандықтар, отандық боксшыларымыздың жетістіктерін мұқият бақылап, олар үшін жанкүйер боламыз. Бразилияның өкілімен өткен жекпе-жектегі алғашқы раундтың өзіндегі сенімді жеңісіңізбен шын жүректен құттықтаймын. Сіз – еліміздің мақтанышы, біз сіздің жеңістеріңізге қуаныштымыз», - деді министр.

Меценат Бауыржан Оспанов Қанат Ислам Р.Ассиспен кездесуіне жақсы дайындалғындығы туралы айтты.

«Қанат бұл кездесуге өте жақсы дайындалып, қиыншылықтарға қарамастан бірінші раундта жеңіске қол жеткізді. Қазіргі таңда ол жалпы рейтингте жоғары көтеріліп, өзге бокс нұсқаларындағы белбеулерді жеңіп алуға үміткер болуға құқығы бар», - деп хабарлады Б. Оспанов.

Сондай-ақ, меценаттың сөзіне қарағанда, Қазақстанда бокс дамуы өте жоғары деңгейде болып табылады. Қазіргі уақыттың өзінде елімізде үлкен бокс кештерін айына немесе жылына бір рет емес, одан да жиі өткізуге мүмкіндік бар.

Әңгімелесу барысында ЭКСПО-2017 Халықаралық мамандандырылған көрмесінің мәдени-бұқаралық және спорттық іс-шаралары аясында Қанат Исламның бокс жекпе-жегін ұйымдастыру мәселесі де талқыланған болатын. Кездесуде айтылып кеткендей, отандасымыздың қатысуымен бокс кешін қыркүйек айының басында өткізу жоспарланып отыр.

«Қазіргі таңда алдымызда үлкен жауапкершілік тұрғандығын түсінемін. Бізде Қазақстанда көп нәрсені бірінші болып істеуге мүмкіндік туып отыр. Сол үшін мен өте бақыттымын. Әр кездесуімнен кейін Президентіміз бен халқымыздың құттықтауын алуға бақыттымын. Қазақстандықтардың жас буыны біздің жетістіктерімізге қарап өсіп келеді, бізден үлгі алады. Сондықтан біз Қазақстанды халықаралық алаңдарда абыроймен көрсетуге міндеттіміз», -  деп ойымен бөлісті Қанат Ислам.