Әли Ахмедов Фируза Шарипованың қатысуымен өтетін бокс кешінде WBC белбеуін қорғайды

Әли Ахмедов. Сурет WBC кеңесінің ресми сайтынан алынды.

Кәсіпқой бокста жартылай ауыр салмақта өнер көрсететін отандасымыз Әли Ахмедов (9-0, 7 КО) жастар арасындағы WBC чемпиондық белбеуін 30 желтоқсан күні Алматы қаласында Фируза Шарипованың қатысуымен өтетін бокс кешінде қорғайды.

Жекпе-жек он раундқа жоспарланып отыр. Бірақ Ахмедовтың қарсыласы әлі анықталған жоқ.

Айта кетейік, Ахмежовтың 8 желтоқсан күні АҚШ жерінде бір кездесуі жоспарланған еді. BoxRec порталының мәліметі бойынша, оның қарсыласы 26 жастағы америкалық боксшы Дешон Уэбстер болады. Ол кәсіпқой бокста тоғыз кездесу өткізіп, барлығында жеңіске жеткен. Алты кездесуде қарсыластарын нокаутқа түсірген.

Бұл кездесуде қазақстандық боксшыға тиесілі белбеуден бөлек жартылай ауыр салмақтағы Солтүстік Америка чемпионының (NABF) белбеуі сарапқа салынады.

22 жастағы Ахмедов кәсіпқой бокстағы бірінші кездесуін 2016 жылдың мамырында өткізіп, осы уақытқа дейін тоғыз жекпе-жекке қатысты. Оның жеті кездесуінде Ахмедов қарсыластарын нокаутқа жіберді. Биыл ол жас америкалық кіші Кертис Хиллдан үстем түсіп, жастар арасындағы WBC чемпиондық белбеуін жеңіп алды.

Еске салайық, 30 желтоқсан күні Алматы қаласындағы "Алматы - Арена" спорт кешенінде өтетін бокс кешінінің басты жекпе-жегінде Фируза Шарипова пен бельгиялық Джемилла Готарюк (13-4-1, 2 КО) шығады. Бұрымды боксшылар екінші жеңіл салмақтағы IBO чемпиондық белбеуіне таласады.

Әлеуметтік желілерде бөлісу