Оңтүстік Кореядағы қысқы Олимпиада ойындарында Қазақстан 9 спорт түрінен бақ сынайды

Елордада ҚР Ұлттық Олимпиадалық комитетінің президенті Тимур Құлыбаев пен Мәдениет және спорт министрі Арыстанбек Мұхамедиұлының төрағалығымен бірлескен жиын өтіп, ұлттық құрама командалардың 2018 жылы Пхёнчхандағы Олимпиада ойындарына дайындығы талқыланды, деп хабарлайды Baq.kz тілшісі.

Оңтүстік Кореяда өтетін Олимпиада ойындарына 90 елдің спортшылары мен ресми тұлғалары қатысады деп күтілуде. Әлемдік додада 15 спорт түрінен 102 медаль жиынтығы сарапқа салынады. Қазақстанның спорттық делегациясы тоғыз спорт түрінен сынға түспек. Жиында бас бапкерлер мен мемлекеттік жаттықтырушылар ұлттық командалардың дайындықтары туралы баяндап, қазіргі таңда басты мақсат - Олимпиада ойындарына жолдама алу және дайындықтың соңғы кезеңін ойдағыдай өткізу дейді.

ҚР Мәдениет және спорт министрлігі спорт және денешынықтыру істері комитетінің төрағасы Елсияр Қанағатовтың айтуынша, 62 спортшы олимпиадалық жолдамадан үмітті. 2017-2018 жылғы маусымда халықаралық іріктеу жарыстарында лицензия алу жалғасады. Бүгінде шорт-трек, фристайл, мәнерлеп сырғанау, шаңғымен тұғырдан секіру, биатлон, шаңғы жарысынан ұлттық құрама командалар қазақстандық бапкерлермен қатар құрамаға шақырылған шетелдік мамандармен жаттығып жатыр.

ҚР ҰОК президенті Спорт туралы заңға енгізілген өзгертулер мен толықтыруларға байланысты ұлттық спорт федерацияларының мәртебесі өсіп, жауапкершілігі арта түседі дейді.

«Ұлттық құрама командалардың дайындығына Ұлттық Олимпиадалық комитет жетекшілік етеді. Егер де бізде әлі «ұйықтап жүрген» федерациялар болса, онда оларды «оятып» көрейік. Егер одан нәтиже болмаса, басшылығын ауыстырайық. Өйткені бізге тек спортты білетін адамдар ғана емес, сонымен қатар оның дамытуға көмектесетін азаматтар керек», - деп түйіндеді Тимур Құлыбаев.

Әлеуметтік желілерде бөлісу