"Қазақ пен өзбек спортшылары бір-бірімен айтысып жүріп...". Мырзағали Айтжанов Токио Олимпиадасында жіберген қателік жайлы

Қазақстан спортшылары Токио төрінен 8 қоламен оралды. Олардың екеуін боксшылар Сәкен Бибосынов пен Қамшыбек Қоңқабаев алды. Ұлттық құраманың бұрынғы бас бапкері Мырзағали Айтжанов күншығыс еліндегі жарыста қазақ спортшыларының жіберген қателігін Vesti.kz тілшісіне берген сұхбатында айтып берді.

- Мырзағали аға, Рио мен Токио ойындарының басты айырмашылығы неде деп ойлайсыз?

- Токио ойындары Рио Олимпиадасына қарағанда өте тартысты өтті. Неге десеңіз, соңғы жылдары әр құрлықта бокстың мықты дамығанын білдірді. Соның ішінде Америка құрлығы өте жақсы дайындықпен келіпті. Оның дәлелі Куба, АҚШ, Бразилия былғары қолғап шеберлерінің көрсеткіші. Жарыс жақсы деңгейде өтті. Өз кезегінде біз де бар күшімізді салдық. Бірақ бұйырғаны қола болды. Бұйырса әлі-ақ, Париж төрінде қуантамыз.

- Посткеңестік елдердің барлығы дерлік осы ойындарда жақсы нәтиже көрсете алмады. Есесіне өзіңіз атап өткен Америка құрлығының спортшылары алға шығып кетті.

- Посткеңестік елдердің арасында Ресей боксшылары жақсы өнер көрсетті. Өкінішке қарай, қазақ пен өзбек бір-бірімен айтысып жүріп, екеуі де жетістікке жете алмай әлем алдында ұятқа қалды.