Футболдан Қазақстан құрамасы ФИФА рейтингінде шарықтады, деп хабарлайды Vesti.kz.
Магомед Адиев жаттықтыратын команда жаңа рейтингте 112-орыннан 104-орынға көтерілген. Бұл бүкіл командалар арасындағы ең жоғары көрсеткіш. Одан кейін Армения құрамасы бірден жеті саты көтерілген (97-ден 90-орынға).
Алайда Армения командасы ұпай қосуда көш басында тұр (+28,52). Қазақстан бұл көрсеткіш бойынша екінші орында (+21,19) келеді.
Еске салайық, Қазақстан жуырда өткен Еуро-2024 турниріне іріктеу матчтерінде Сан-Марино (3:0) және Солтүстік Ирландияны (1:0) ұтқан болатын.