Валерий Карпин "Ростовтың" бас бапкер қызметінен кетті, деп хабарлайды клубтың ресми сайты. Енді ол Ресей құрамасының бас бапкері міндетін атқарады.
Мұндай шешім Валерий Карпин мен "Ростовтың" президенті Арташес Арутюнянц арасындағы кездесуден кейін қабылданды.
Ал "Спорт-Экспресс" басылымының ақпараты бойынша, "Ростов" тізгінін Қазақстан құрамасы мен "Астана" командасының бұрынғы бас бапкері Станимир Стоилов ұстауы мүмкін. Сондай-ақ кандидаттардың қатарында Дан Петреску мен Мурад Мусаев та бар.
"Бапкерлермен келіссөз әлі өтпеген. Алайда үш маман да команданың тізгінін ұстауға дайын", - деп жазады дереккөз.
Еске салайық, 26 шілде күні Карпин Ресейдің футбол одағымен келісімшарт жасап, құраманың бас бапкері атанды. Келісімшарт 2021 жылдың 31 желтоқсанына дейін жасалды.
Ресей құрамасы келесі кездесуін 1 қыркүйекте 2022 жылғы әлем чемпионатына іріктеу аясында Хорватия құрамасына қарсы өткізеді.
Бұған дейін Ресейдің бас бапкерлік қызметін Станислав Черчесов атқарып, Еуропа чемпионатындағы нашар көрсеткіштен кейін қызметінен босатылды.
Стоилов болса "Астана" командасын 2014 және 2018 жылдары, ал Қазақстан құрамасын 2018 және 2019 жылдары жаттықтырды.