Сергей Гришин: "Ақтөбе" бізге ойынды "бере салуды" сұрады"

Сергей Гришин. Сурет bolshoisport.ru сайтынан алынды

Елордалық "Жеңіс" клубының бұрынғы ойыншысы Сергей Гришин sports.ru сайтына Қазақстанда өнер көрсеткен уақытында болған қызық жайтты айтып берді, деп хабарлайды Vesti.kz.

- Қазақстанда футбол жайлы айтсаңыз?

- Біздің ұжым мықты еді. Бір-екі жергілікті футболшы болды, қалғандарының бәрі орыстар. Біріншілік аяқталуға аз қалған уақытта болашақ чемпиондар бізге ойынды "бере салуды" сұрады. Әрине, біз бастарттық. Ойында алғаш болып есепті біз аштық. Екінші таймның басында мен алаң шетімен жүгіріп, қақпа алдына пас берем. Әріптесім гол соқты. Бірақ төреші жалаушасын көтеріп, командаласымның ойыннан тыс қалғандығын көрсетті. Мен: "Допты артқа бердім ғой" деп жанұшыра айқайласам да ешкім тыңдай қойған жоқ. 88-ші минутта біздің қақпаға пенальти белгіледі. Қақпашымыз Плотников қақпасын голдан аман сақтап қалды. Арада бір минут өтпей тағы бір 11 метрлік айыпдобын тағайындады. Есеп 1:1. 90-шы минутта үшінші мәрте біздің қақпаға пенальти белгіледі, ха-ха! Осылайша 1:2 есебімен жеңіліп қалдық. Көңілді біріншілік. Еске алатын нәрселер көп-ау.

Әлеуметтік желілерде бөлісу