Қазақстан құрамасына шақыртуды қуана қабылдайтын едім - Жерар Гоу

Футболдан Қазақстан Премьер-лигасында үш рет үздік сұрмерген атанған алматылық "Қайраттың" бұрынғы шабуылшысы Жерар Гоу Vesti.kz порталының тілшісіне берген сұқбатында Қазақстан құрамасының намысын қорғауға дайын екенін айтып берді. 

29 жастағы шабуылшы бірнеме маусым "Қайраттың" намысын қорғап, клуб тарихындағы үздік сұрмерген атанған болатын. 2017 жылғы маусымның соңында ол алматылық клубтан кетіп, қытайлық "Бейцзин Энтерпрайзес" сапына ауысты. 

- Жерар Қытайда қалай өмір сүріп жатырсыз? Ол жаққа үйреніп қалдыңыз ба?

- Бірінші кезекте барлық Қазақстан халқына сәлем жолдағым келеді. Тек ғана футболда емес, өмірде де сәттілік тілеймін. Қазір мен Қытайда жаңа командаммен біргемін. Барлығы көңілімнен шығып жатыр. Бұл елде карьерамды жалғастырып жатқаныма да ризамын. Қытайлықтардың менталитетіне әлі үйренісіп жатырмын. Қазақтармен қытайлардың арасында керемет айырмашылық бар деп айта алмаймын. Жалпы Қытай маған ұнады. Пекин - замануи үлкен қалалардың бірі. 

- Команда сізді қалай қабылдады ?

- Біздің команда негізі жергілікті футболшылардан құралған. Бірақ ешқандай дискомфортты сезініп жүрген жоқпын. Барлығы көңілімнен шығады. Команда басшылары мен қызметкерлері тарапынан қолдау бар. Мұның өзі футболшы үшін жақсы дүние. 

- Сіз Қытайға бара салып, гол соға бастадыңыз. Бірақ сіз "Қайраттан" кеткеннен соң ешқандай командамен оқу-жаттығу жиындарына қатыспаған едіңіз ...

- Футболды қатты сағынып қалғанмын ғой. Командаға тез бой үйретіп алдым. Сосын өзімнің сүйікті ісіммен айналыса бастадым. Менің ойымша, Қазақстан мен Ресей және Қытай біріншіліктері бір-біріне ұқсайды. Сосын тез бой үйреттім. Бұл елдерде ойнайтын қиын деңгейге бірден үйреніп алдым. Ресейдің "Краснодар" клубында өнер көрсетіп жүргенімде көп тәжірибе алдым. "Қайраттан" кейін практика жағынан біраз қиындықтар болған еді. Алайда қазір оның барлығы артта қалды. Біз кәсіпқой футболшымыз. Бізге салынған ақшаны ақтап, нәтиже көрсетуіміз керек. 

- Кейбір БАҚ сізді Қазақстан құрамасында ойнауы мүмкін деп жазды. Шынымен де сіз Қазақстан құрамасында ойнағыңыз келді ме?

- Иә, бұл шындық. Айтпақшы, мен қазір де бұл ойымнан айныған жоқпын. Егер мені Қазақстан құрамасына шақыртатын болса, шақыртуды қуана қабыл аламын. Ұлттық құраманың намысын қорғау - әр футболшының арманы. 

- Сондай-ақ БАҚ сіздің "Қайратта" қалғыңыз келгеніңізді жазды. Бірақ клубпен қаржылық мәселені шеше алмапсыз дейді ...

- Футболда біз кейбір нәрселерге жылдам келісетін болса, кейбір дүниелерді келісу қиын болады. Дегенмен де "Қайрат" секілді командада Алматы сияқты әдемі қалада тұрғаныма қуаныштымын. 

- Қазіргі "Қайрат" туралы не айта аласыз? Клубтың ойындарын бақылап жүретін шығарсыз.

- Қазір мен басқа клубтан өнер көрсетіп жатсам да, бұрынғы клмандамның өнерін қадалап жүремін. "Қайрат" қазір жақсы ойын көрсетіп жатыр. Команданың құрамы жақсы жасақталған. Ұжымның бапкерлер қосыны - Қазақстандағы ең мықты мамандардан құралған. 

- Сіздің орныңызға келген Уго Сильвейрудың ойынын көрдіңіз бе ?

- Иә, "Қайраттың" бірнеше ойынын көрдім. Уго - өте жақсы футболшы. Ол "Қайраттың" шабуыл шебіндегі мәселені біраз уақытқа жаба алады. 

- Қазіргі "Қайрат" сапындағы футболшылармен араласып тұрасыз ба? 

- Олармен байланысты үзбеуге тырысамын. Біз әлеуметтік желілерде хат алмасып, бір-бірімізге қоңырау шалып тұрамыз. Команда ішінде бөліну деген жоқ. Мұндай атмосфера онда ұзақ уақыт сақталады деп ойлаймын.