"Қайраттың" бас бапкері Шпилевскийден коронавирус шықты - дереккөз
Алексей Шпилевский. Сурет "Қайраттың" сайтынан алынды.
Алматылық "Қайрат" футбол клубының бас бапкері Алексей Шпилевскийдің коронавирусқа тапсырған тесті оң нәтиже көрсетті, деп хабарлайды спорт тілшісі Айдын Қожахмет өзінің телеграм-каналында.
32 жастағы маман 19 маусым күні "Оқжетпеске" қарсы кездесуге қатыспаған. Бұл ойына 3:2 есебімен алматылық команданың пайдасына аяқталды.
"Менде екі дереккөзден ақпарат бар. Бірақ екеуі бір-біріне қайшы. Біреуі Шпилевскийдің бұрын ауырғанын айтады. Сол үшін де ол "Оқжетпеске" қарсы кездесуге қатыспаған. Емделген. Қазір сауығып шыққан көрінеді. Екіншісі бапкердің қайта ауырып қалғанын айтты", - деп жазады Қожахмет.
Айта кетейік, алдағы турда Шпилевский командасын бәрібір басқара алмайды. Себебі, ол "Шахтерге" қарсы өткен екінші турда қызыл қағаз алып кеткен еді.
Футболдан ел біріншілігі 16 наурызда тоқтаған еді. Енді 1 шілде күні қайта жалғасу керек. Бұл күні "Қайрат" өз алаңында "Жетісуға" қарсы матч өткізеді. Кездесу 18:00-де басталады.