Еурододадан шығып қалған "Астана" құраманың жартысын сататын болды

Сурет "Астана" сайтынан алынды.

Еурододадан шығып қалған елордалық "Астана" командасы құрамындағы бірнеше легионерлерді сататын болды. Бұл туралы спорт тілшісі Айдын Қожахмет хабарлап отыр.

"Астана басшылары биылғы маусым аяқталған соң сататын 10-12 футболшының тізімін дайындап отыр.

Клубтың еурокубоктен шығып қалуы және Қазақстан чемпионатындағы сәтсіз ойындарынан кейін команда басшылары өз орындарын сақтап қалу үшін осындай қадамға барып отыр. Олар кінәнің барлығын сол футболшыларға жапқысы келуде. Тізімді команданың уақытша бас бапкері Пол Эшуорт пен клубтың директоры Ғани Қайназаров жасаған.

Бұл тізімде Евгений Постников, Юрий Логвиненко және Ненад Эрич секілді команданың лидерлері де бар екен", - деп жазады журналист телеграмм каналында.

Еске салайық, "Астана" биылғы маусымда еурододаны Чемпиондар лигасында бастаған болатын. Бірақ бірінші айналымда елордалық команда "Динамо-Брест" командасынан 3-6 есебімен жеңіліп қалды. Кейін клуб Еуропа лигасының екінші іріктеу кезеңінде ойнады. Онда "Астана" черногориялық "Будучность" командасынан 0-1 есебімен ұтылды.

Әлеуметтік желілерде бөлісу