Елордалық "Астана" Станимир Стоиловты командаға қайта шақырғысы келіпті,-деп хабарлайды
KazFootball.kz порталы.
Команда тамыз айының соңында Михал Билектің қызметінен кеткенінен кейін бас бапкерсіз қалды. Сосын "Астана" басшылары 53 жастағы болгариялық маманға ұсыныс жасапты. Бірақ ол келіспеген. Бапкер команданың басшылары ауыспай, тізгінді ұстаудан бас тартыпты.
Стоилов "Астана" тізгінін 2014 жылдың жазында ұстаған еді. Оның бастамасымен елордалық ұжым Қазақстан чемпионатын төрт рет ұтып алды. Сонымен қатар, Қазақстан футбол тарихында бірінші рет Чемпиондар лигасының топтық кезеңіне, екі рет Еуропа лигасының 1/16 финалына шықты.
Болгариялық маманның соңғы жұмыс орны Қазақстан ұлттық құрамасы болған еді. Біздің командадан ол 2019 жылдың қаңтарында кетті.