"Астана" Кабананганың орнына Жерар Гоуды сатып алмақшы

Жерар Гоу. Сурет "Қайрат" клубының ресми сайтынан алынды.

Елордалық "Астана" алматылық "Қайраттың" бұрынғы шабуылшысы Жерар Гоумен келіссөз бастады, деп хабарлайды Vesti.kz порталы.

Қазақстанның төрт дүркін чемпиондары бүгін өздерінің негізгі шабуылшысы Жуниор Кабананганы Сауб Арабиясы біріншілігінде өнер көрсететін "Аль-Наср" клубына сатты. Енді елордалық команда конголық шабуылшының орнын басатын футболшы іздестіріп жатыр.

Кабанганың орнын "Астана" сапында Гоу басуы мүмкін. Оның үстіне ивуарлық шабуылшы Қазақстан біріншілігінде өнер көрсеткен. Бейресми мәлімет бойынша, елордалық клуб шабуылшының өкілдерімен келіссөз бастап кетіпті. Сонымен қатар "Астана" басқа да шет елдік шабуылшылармен келіссөз жүргізіп жатыр екен.

Айта кетейік, Гоудың өкілдері "Қайратқа" шығып, жаңа келісімшарт жасауды ұсынған болатын. Бірақ бұл келіссөздер алға жылжыған жоқ. Шабуылшының өзі болса "Қайрат" сапына қайта келуге кет әрі емес.

29 жастағы Гоу "Қайрат" сапында 2014 жылдың жазынан бері өнер көрсетіп келді. Ол соңғы үш маусымда Қазақстан біріншілігінің үздік шабуылшысы атанды. Жалпы "Қайрат" сапында иварлық шабуылшы 104 гол соғып, алматылық клуб тарихындағы үздік сұрмерген болды.

Әлеуметтік желілерде бөлісу