"Қазақстан барысы" додасында белдесетін ең ауыр балуан кім?

Қазақстан Республикасы Тұңғыш Президентінің жүлдесі үшін қазақ күресінен «Қазақстан Барысы» VII Республикалық турниріне қатысатын ең ауыр салмақтағы балуанның есімі белгілі болды.

ЭКСПО жанындағы"Mega Silk Way" ойын-сауық орталығында өткен салтанатты салмақ өлшеу рәсімінде ақтаулық Кенжебек Күзембаевтың салмағы ең ауыр болып шықты. Ол - 145,800 келі болды. Екінші сатыда Еламан Ерғалиев. Оның таразыдағы көрсеткіші - 141,600 келі. Ал, 2013 жылғы "Қазақстан барысы" атанған шығысқазақстандық балуан Айбек Нұғымаров ауыр балуандардың "үздік" үштігін түйіндеді. Оның салмағы - 136,500 келі.

Айта кетейік, "Қазақстан Барысы" финалына еліміздің 14 облысы, Алматы мен Астана қалалары және әскерилер арасында іріктеуден үздік шыққандар қатысады. "Қазақстан Барысы" турнирінің финалы 2 шілде күні сағат 12:00-де Астана қаласындағы "Барыс Арена" мұз сарайында өткізіледі. Қазақстан аумағында "Қазақстан Барысы" турнирінің ресми бас хабар таратушысы "Қазақстан" және "Қазспорт" телеарнасынан тікелей эфирде көрсетеді.