Қазақстандық белгілі спорт функционері Бекет Махмұтов көз жұмды

Бүгін, 14 сәуірде спорт функционері Бекет Сапабекұлы Махмұтов 81 жасында дүниеден өтті.

Ол бокстан Қазақстан Республикасының еңбек сіңірген жаттықтырушысы, самбодан КСРО спорт шебері, Халықаралық бокс федерациясының (АІВА) бұрынғы вице-президенті, Қазақстан бокс федерациясының және Қазақстан дзюдо федерациясының президенті болған. 

Қазақстан Ұлттық Олимпиадалық комитетінің президенті Тимур Құлыбаев марқұмның отбасына көңіл айтты.

!Қазақстан спорты үлкен қазаға ұшырады. Белгілі қоғам қайраткері, спортшы әрі бапкер Бекет Сапабекұлы Махмұтов өмірден өтті. Еліміздегі ең құрметті спорт атқамінерлерінің бірі және қоғам қайраткері бар өмірін отандық спортты дамытуға арнады. Ол ұзақ жылдар бойы Қазақстан әуесқой бокс федерациясын басқарып, Халықаралық федерацияда басшылық қызмет атқарған алғашқы қазақстандық өкіл санатына енді, сонымен қатар, дзюдо федерациясын басқарды. Бекет Сапабекұлының басшылығымен қазақстандық бокс әлемдік аренада нық қадам басқан болатын. Оның қолдауы, кәсіби шеберлігі және спортқа деген сүйіспеншілігінің арқасында отандық боксшылар Олимпиада ойындары мен өзге де ірі жарыстарда үлкен жетістікке жетті. Өзімнің және Қазақстан Ұлттық Олимпиадалық комитетінің, сондай-ақ, еліміздегі барлық спорттық қоғамдастық атынан Бекет Сапабекұлы Махмұтовтың өмірден өтуіне байланысты марқұмның жақындары мен туыстарына және барша әріптестеріне қайғырып көңіл айтамын", - деп келтіреді Құлыбаевтің сөзін olympic.kz.