Каратэден Қазақстан құрамасының өкілі Никита Тарнакин Эр-Риядтағы (Сауд Арабиясы) Ислам ынтымақтастығы ойындарының жеңімпазы атанды.
Қазақстандық каратэші 84 келіге дейінгі салмақта ел намысын қорғады.
Отандасымыз ақтық сында Иордания спортшысы Мухаммед Аджафаримен кездесті. Нәтижесінде Тарнакин шешуші жекпе-жекте 8:3 есебімен жеңіске жетті.
Никита бұл оның осы маусымдағы соңғы ірі жарысы екенін атап өтті.
"Дайындық барысында еткен еңбегімнің ақталғанына өте қуаныштымын. Ішкі сезімді сөзбен айтып жеткізу мүмкін емес. Маусымды жеңіспен аяқтағаныма дән ризамын.
Бұл жыл мен үшін аяқталды. Алда қалпына келу кезеңі бар. Әлем чемпионатына іріктеуден өте алмадым. Сондықтан ұлттық құрамаға сәттілік тілеймін. Әлем чемпионатында көптеген жүлдеге қол жеткізетінімізге үміттенемін.
Ислам ынтымақтастығы ойындарының медалін барша қазақ халқына, жақындарыма, отбасым мен достарыма, маған сенген әрбір жанкүйерге арнаймын", - деді спортшы.
Жарнама