Астаналық «Барыс» хоккей клубы Құрлықтық хоккей лигасының (ҚХЛ) тұрақты чемпионаты аясында омбылық «Авангард» командасын жеңді,- деп хабарлайды Vesti.kz.
Кездесу Астанада өтіп, 6:2 есебімен «Барыстың» пайдасына аяқталды. Елорда ұжымы 2:0 есебімен алға шыққанымен, кейін қарсылас есепті теңестірді. Алайда Михаил Кравецтің шәкірттері ойынның қалған бөлігінде басымдық танытып, алты матчқа созылған жеңілістер сериясын үзді.
«Барыс» сапынан Райли Уолш (5-минут), Мэйсон Морелли (6), Майкл Веккьоне (41), Әділ Бекетаев (44), Всеволод Логвин (52) және Дінмұхамед Қайыржан (57) көзге түсті. Ал «Авангард» құрамынан Николай Прохоркин (14) мен Дамир Шарипзянов (35) шайба соқты.
Осы жеңістен кейін «Барыс» 16 ұпаймен Шығыс конференциясында жетінші орында тұр. Ал «Авангард» 22 ұпай жинап, екінші орыннан көрінуде.
Келесі ойынын астаналықтар 18 қазанда өз мұз айдынында Қазанның «Ақ Барс» командасына қарсы өткізеді.