Алда тартысты ойындар күтіп тұр – Старыгин

Өмірбек Сансызбай

Хоккейден Қазақстан студенттер құрамасының бас жаттықтырушысы Қытаймен өткен ойыннан кейінгі баспасөз мәслихатында командасын алда тартысты ойындар күтіп тұрғанын айтты. Тілшілердің сұрақтарына жауап беріп, шәкірттеріне көңілі толатынын тілге тиек етті.

- Универсиада енді ғана басталды. Дайындығымызды байқаттық. Қарсыластар әлсіз шықты. Ойын тамаша нәтижемен аяқталды. Жігіттер жарады. Қазақстандықтар мен шәкірттерімді жарқын жеңісімен құттықтаймын.
Бүгін Швеция мен АҚШ арасындағы жолдастық ойынды көрдім. Ресей, Словакия және Канада хоккейшілері де қауқарлы. Алда тартысты ойындар күтіп тұр, - деді бас жаттықтырушы.

Ойын соңынан Қытай хоккейшілерін бастап келген жаттықтырушы Ванг Беню да өз ойын білдірді.

- Сіздердің командаларыңыз өте мықты. Келешекте сіздерден сабақ алып ойнайтын боламыз. Деңгейі жоғары. Жеңістеріңізбен құттықтаймын. Біздің құрама 3 университеттің студенттерінен жасақталды. Командада 17 ғана хоккейші бар. Екеуі жарақат алып қалды. Келесі ойынға тыңғылықты дайындаламыз, - деді.

Айта кетейік, «Халық Аренада» өткен ойында Қазақстан студенттер құрамасы Қытайды 22:0 есебімен ұтты. Отандастарымыз келесі ойынын 31 қаңтар күні Швецияға қарсы өткізеді.

Әлеуметтік желілерде бөлісу