Карьерасын аяқтаған Илья Ильин лауазымды қызметке тағайындалды
Сурет: Илья Ильиннің Instagram желісінен
Ауыр атлетикадан әлемнің төрт дүркін чемпионы Илья Ильин спортшы карьерасын аяқтады және Қызылордадағы "Мұз айдыны" кешенінің директоры қызметіне тағайындалды, - деп хабарлайды "Кызылординские вести".
Сәуірде Ильин облыстың жаңа әкімі Гүлшара Әбдіхалықовамен кездесу өткізгені туралы айтқан еді. Кездесу барысында ауыр атлет карьерасын аяқтайтынын және өзін спорт менеджментінде сынап көретінін хабарлаған.
Мамырдың басында Ильин Vesti.kz сайтының Instagram-дағы парақшасында жүрген тікелей эфирде коронавирус пандемиясы салдарынан 2021 жылға көшірілген Олимпиада-2020-ға қатыспау туралы шешімін мәлімдеді.
Айта кетейік, 31 жастағы ауыр атлет 2005, 2006, 2011 және 2014 жылдағы Әлем чемпионаттарының жеңімпазы. 2016 жылы ол допингке қайта тест тапсырғаннан кейін 2008 және 2012 жылдары Олимпиада ойындарында жеңген алтын медальдарынан айырылып, екі жылға жарыстардан шеттетілді.