Ауыр атлетика федерациясы спортшылардың еңбекақы бойынша шағымына жауап берді
Нижат Рахимов. Сурет: wfrk.kz©
Ауыр атлетика федерациясы ұлттық құрамадағы спортшылардың шағымына жауап берді, - деп хабарлайды Vesti.kz.
Осыған дейін қазақстандық зілтеміршілер жалақының төленбеуіне байланысты видеоүндеу жариялаған болатын.
"Біз, ауыр атлетикадан Қазақстан ұлттық құрамасының мүшелері, жарты жыл бойы жалақымызды ала алмай жүрміз. Себебі, федерацияда белгісіз себептерге байланысты проблема туындап жатыр", - деген еді Рио-2016 олимпиадасының чемпионы Нижат Рахимов және басқа спортшылар.
Ауыр атлетика федерациясы Vesti.kz тілшісіне оқиғаның мән-жайын түсіндірді.
"Ашығын айтқанда, ауыр атлетикадан Қазақстан ұлттық құрамасының мүшелерінің бірнеше табыс көзі бар. Оның бірі - Ұлттық Олимпиада комитеті беретін жалақы. Ол тиісті уақытта, толық көлемде беріліп отыр. Ал федерация демеушілік ақшаның негізінде қосымша төлемдер болып саналатын төлемдерді ұсынады. Біз тиісті мерзімде төлемдер жүргізілмегені туралы ақпаратты растаймыз. Мәселе қосымша төлемдерге байланысты болып тұр", - дейді федерация өкілдері.