"Баварияның" бас бапкері қызметінен кетуі мүмкін

"Бавария" бас бапкері Карло Анчелотти қызметінен кетуі мүмкін. Бұл туралы Bild басылымы хабарлады. Таяуда мюнхендік "Бавария" Чемпиондар лигасының топтық кезеңіндегі екінші айналымда француздық "ПСЖ" (0:3) алаңында жеңіліп қалды. Кейбір көшбасшы ойыншылар негізгі құрамға енбегені үшін наразылық білдірді. Анчелоттидің өзі осы құрамның әлі-ақ бағы жанатынына кәміл сенеді. 

"Бавария" басшылығы, оның ішінде Карл-Хайнц Румменигге және спорттық директоры Хасан СалихамиджичАнчелоттидің Мюнхенге барғанға дейін пікір білдіруден бас тартты. Елге келгеннен кейін, жедел жиналыс болатыны айтылады. Ондағы басты мәселе Анчелоттидің жұмысы. 

58 жастағы маман отставкаға кететін болса, оның орнына уақытша міндетін атқарушы 40 жастағы Вилли Саньоль болады. 

Карло Анчелотти "Баварияны" 2016 жылдың шілдесінен бастап жаттықтырып келеді. Оның келісімшарты 2018/2019 маусым аяқталғанға дейін жасалған.