Қазақстан мен Франция кездесуіне жанкүйерлер кіре ала ма? ҚФФ жауап берді

2022 жылғы әлем чемпионатының іріктеу кезеңі аясында Қазақстан мен Франциясы арасындағы кездесуге жанкүйерлерді жіберуі мүмкін. Бұл туралы ҚФФ ресми сайтында хабарлады. 

D тобындағы бұл ойын Нұр-Сұлтан қаласында 28-наурыз күні өтеді. Бұл қазақстандық футболшылар үшін іріктеу кезеңіндегі бірінші матч болады. Франция құрамасы қазіргі таңда әлем чемпионы. 

"Қазақстан футбол федерациясы Нұр-Сұлтан қаласының бас дәрігерімен алдағы ойынға жанкүйерлерді кіргізу туралы келіссөз жүргізіп жатыр. Егер шешім оң болса, Қазақстан мен Франция арасындағы ойынға 30 пайыз жанкүйерлер кіреді. Ал билеттер 10-12 наурыз аралығында сатылымға шығады", - деп жазды ҚФФ баспасөз қызметі. 

Айта кетейік, алдағы әлем чемпионаты 2022 жылдың 21-қарашасы мен 18-желтоқсаны аралығында өтеді. Әлем чемпионатының финалдық кезеңіне тікелей жолдаманы топтан бірінші орын алған құрамалар иеленеді. Ал топтық кезеңнің қорытындысы бойынша екінші орын алған 12 команда мен 2020/2021 маусымда Ұлттар лигасында үздік шыққан екі команда тоғыспа кездесулерде үш жолдаманы сарапқа салады. 

Қазақстан құрамасының ойын кестесі: 

28.03.2021 Қазақстан - Франция
31.03.2021 Украина - Қазақстан
01.09.2021 Қазақстан - Украина
04.09.2021 Финляндия - Қазақстан
07.09.2021 Босния және Герцеговина - Қазақстан
09.10.2021 Қазақстан - Босния және Герцеговина
12.10.2021 Қазақстан - Финляндия
13.11.2021 Франция - Қазақстан