"Қайраттың" сапына "Гамбургтың" бұрынғы футболшысы қосылды

"Қайрат" футбол клубы хорватиялық жартылай қорғаушы Иво Иличевичпен келісімшартқа қол қойды, - деп хабарлайды алматылық команданың ресми сайты.

30 жастағы футболшы алматылық командамен келісімшарт мерзімі 2+1 үлгісі бойынша жасалған.

Хорватиялық ойыншы соңғы маусымды ресейлік "Анжи" командасының сапында өткізген. Ресей біріншілігінің алғашқы айналымында 14 кездесуде алаңға шығып, 2 гол және 1 нәтижелі пастың авторы атанған. "Анжи" клубының басшысы ауысып, бюджеті едәуір азайғаннан кейін хорватиялық футболшы командадан кету туралы шешім қабылдады.

Иво Иличевич неміс жерінде туып-өскенімен 2010-2013 жылдар аралығында Хорватия ұлттық құрамасының намысын қорғады. 2012 жылы өткен Еуропа чемпионатына жарақат алғанына байланысты қатыса алмаған.

Айта кетейік, "Қайраттың" жаңа ойыншысы Ресей чемпионатына ауыспай тұрып, немістің "Гамбург", "Бохум", "Гройтер Фюрт", "Кайзерслаутерн" және "Дармштатд" командаларында доп тепкен. Жалпы алғанда немістің Бундеслигасында 134 мәрте алаңға шығып, 18 рет қарсылас қақпасына гол соқты.

Әлеуметтік желілерде бөлісу