"Астана U21" маусымды елордада бастайды

"Астана" ФК ресми сайтынан

Василий Маруняк шәкірттері алғашқы кездесулерін «Атырауға» қарсы өткізеді. Бұл ойын «Тарлан-Арена» спорт кешенінде сағат 15:00-де өтеді.

Осы маусымның басында «Астана U21» командасының қатарын футбол орталығының бірнеше ойыншылары толықтырды. Олар: қорғаушы Дәурен Ысқақов (1999ж), жартылай қорғаушылар Артем Цой (2000ж), Нұрдаулет Маматов (1998) және Рамазан Каримов (1999ж). Бұл ойыншылардан бөлек команда құрамын елорда футбол мектебінің түлегі, кезінде Бразилияда 3 жыл оқып келген Саян Мұқанов толықтырды. Мұхиттың арғы жағынан келгеннен кейін талантты ойыншы Бірінші Лигадағы «Бәйтерек» командасы сапында екі маусым өткізген.
Ал маусымның беташар ойынына келер болсақ, астаналықтар өткен жылы «Атырау» командасымен екі мәрте кездескен. Батыс Қазақстанда өткен ойында 3:3 есебімен тең түссе (гол соққандар: Біржан Құлбеков, Сұлтан Сағнаев, Мәди Жақыпбаев), ал Астанада өткен ойында 3:1 есебімен жеңіске жеткен. Бұл ойында Владислав Прокопенко, Руслан Махан және Лев Скворцов нәтижелі соққыларымен ерекшеленген.

Әлеуметтік желілерде бөлісу