Алжир құрамасы 2026 жылғы әлем чемпионаты қарсаңындағы жолдастық матчта Боливия командасын жеңді, деп хабарлайды Vesti.kz.
Кездесу АҚШ-тың Канзас штатындағы Лоуренс қаласында өтті. Алдағы мундиальда өнер көрсететін Алжир құрамасы Латын Америкасы өкілін 4:0 есебімен ойсырата ұтты.
Бірінші тайм аяқталар сәтте Аисса Манди есеп ашты.
Екінші таймда африкалық құрама төрт минут ішінде тағы үш гол соқты. Амин Гуири 57 және 59-минуттарда мергендік танытса, 61-минутта Анис Хадж Мусса қарсылас қақпасын дәл көздеді.
Айта кетейік, Алжир құрамасының қақпашысы Люка Зидан - аңызға айналған француз футболшысы әрі бапкері Зинедин Зиданның ұлы. Ол бұл матчта қосалқы құрамда қалып, алаңға шыққан жоқ.
Еске салайық, Алжир құрамасы әлем чемпионатында J тобында сынға түседі. Топтағы қарсыластары - Аргентина, Аустрия және Иордания құрамалары.
Жарнама